屋村師奶的偵探頭腦

晚飯後習慣到步行徑急步行一個鐘，年半前搬來的時候，我習慣了望天、望地的一個人走着，不理會身邊的人及物，怕的是  ... 惹  ...  是  ... 非  ...

因為在香港島私人樓宇住的時候，大家鄰居在電梯口踫見，我跟他人打招呼，很多都是木無表情的，久而久之，我都學會了保持距離；收埋我的熱情  ...

但那些屋村師奶們卻都一羣一羣的，坐在石櫈上聊天  ...

當有陌生人行過，都會七嘴八舌的對你研究、研究，我就是給她們研究了好幾個月了  ...

始終她們都是沒有惡意的，有時她們見你行過，就會問很多不同的問題：

『早咗喎！』

『唔使煮飯呀？』

『返咗大陸呀？』

『去旅行呀？我嗰日見你好早拉住個篋喎！』

『成日都可以去旅行、唔使做、你就好啦！』

『唔好行咁快呀！減肥都唔係咁減，睇住個心臟呀！』

『看來你真喺有成績喎！瘦咗幾多磅呀？』 ...

每一日，她們都用她們 ＜屋村師奶的偵探頭腦 ＞ 去查探她們的獵物  ...

漸漸我也習以為常，識得避重就輕，因為她們的線眼跟網絡，真的是很廣呢！

真的是可以答案 ＜ 問一得十 ＞ 呢  ...

最好笑是  .....

今晚看見她們目光一致的，看著對面路旁的一個戴黑框眼鏡青年  ...

他穿白裇衫、黑西衭，看上去樣子有點苯苯的，手上拿着一大束鮮花  ...

時而坐在路駁磚上、有時行來行去，整弄手上的鮮花束；一臉疲累的樣子  ...

師奶們說看了他個多小時，保守估計那青年都應該等了兩個多小時，因為他的屁股衭子都坐白了。

她們的小宇宙開始運作了  ... 

七嘴八舌的：

『梗係失戀補飛啦！』

『拍拖嘛、梗要送花啦！』

『点解唔送上去啫？企喺度，好似個儍仔咁！』

『你睇佢？ 着到好似個餐廳侍仔咁，邊會吼佢吖！』

『束花咁大，都應該唔平呀？』

『母親節唔知又有無花俾阿媽呢？』

『都唔使慌啦！梗係女友親架啦！』 

扯到好遠、好濶  ...

最後又拉着我，問我怎看法  ...

無法喇！唔知是要應酬一下，還是已習染了屋村師奶的風氣  ...

我也說了兩句：

『看來不像失戀、一是剛相識、未定，搞表白！』

『一是想再進一步、搞驚喜！』

『你又知？梗係你以前試過啦？』

『我老公都未送過花俾我！正衰佬！』

『死咗咪大把人送花俾你囉！』

『邊有咁好死吖？結了婚你就知！』

『女人昏迷才結婚的呀！字都有你寫吖！』

唉！

我都沒有她們那麽好氣，繼續行埋我剩下來的兩圈路 。
十多分鐘再回頭，已見她們看着一架私家車，指指點點  ...

『個女仔坐小巴回來，他就送花啦！唔知搞唔搞得定呢？』

『個女仔有無喊呀？』

『痴線！有花收都喊？』

『有無鬧佢吖？』

我行過車邊，瞥了一眼，個女仔很漂亮、長髮，甜絲絲的拿著那束花  ...

雖然答案大家都不知道誰估中了，但已足夠她們忙了一個晚上  ...

最搞笑的是  ...

那個青年駕着他的車在廻旋處繞了 一個圈，還向師奶們擺了一下手呢！

好像是向她們示威呢！

而且還像告訴她們：

＜ 我駕的是寶馬呢！我得咗啦！不要看扁我！ ＞

哈哈！有趣  ...

『抵得佢吖！』

『咁有錢、又著成咁？』

『個頭油淋淋、成個傻仔咁！』

『Gel 頭呀！你識唔識呀！』

吱吱喳喳一輪，最後是各自歸家去煲劇，一哄而散  ...   

不過我親身感受到她們都很有師奶智慧和很有愛心的  ...

因為她們有時會送我一樽又一樽的粉葛湯、涼茶等  ...

因為她們知道我不會煲，及是一個熱底人  ...

『一個人、煲乜呀！有就預你一啖囉！』 

我幾十年來嘅第一件 ＜ 溫暖牌 ＞，亦是她們送我的  ...

接過的時候，我淚盈於睫  ...  

如果我有幾天不出現，她們會相互問問有沒有見過我 ，因為她們知我一個人住  ...

但是她們的表達方式就是：

『我們怕你變了腐屍，屍水流到樓下才知咋！』